சென்னை, மெட்ரோ ரெயில் திட்டத்தின் முதல் கட்டப்பணிகள் நிறைவடைந்து மெட்ரோ ரெயில்கள் இயக்கப்பட்டு வருகிறது. இதனை தொடர்ந்து வண்ணாரப்பேட்டையில் இருந்து திருவொற்றியூர் அடுத்து உள்ள விம்கோ நகர் வரை 9 கிலோ மீட்டர் தொலைவிற்கு நீட்டிக்கும் பணிகள் ரூ.3 ஆயிரத்து 770 கோடி செலவில் நடந்து வருகிறது.

முதல் கட்ட நீட்டிப்பு பணிகளில் சுரங்கப்பாதையில் சர்.தியாகராயர் கல்லூரி மெட்ரோ ரெயில் நிலையம் மற்றும் கொருக்குப்பேட்டை நிலையம் ஆகிய இரண்டு ரெயில் நிலையங்கள் மற்றும் உயர்மட்டப்பாதையில் தண்டையார்பேட்டை, சுங்கச்சாவடி, தாங்கல், கவுரி ஆசிரமம், திருவொற்றியூர், விம்கோநகர் ஆகிய 6 ரெயில் நிலையங்களும் அமைக்கும் பணி போர்க்கால அடிப்படையில் நடந்து வருகிறது. இந்தநிலையில் சென்னை, மெட்ரோ ரெயில் நிறுவன நிர்வாக இயக்குனர் பங்கஜ்குமார் பன்சால் உள்ளிட்ட மெட்ரோ ரெயில் நிறுவன அதிகாரிகள் மற்றும் பொறியாளர்கள் வண்ணாரப்பேட்டையில் இருந்து திருவொற்றியூர் விம்கோ நகர் வரை நேற்று ஆய்வு செய்தனர்.

இதுகுறித்து சென்னை மெட்ரோ ரெயில் நிறுவன அதிகாரிகள் கூறியதாவது:

வண்ணாரப்பேட்டையில் இருந்து கொருக்குப்பேட்டை ரெயில் நிலையம் வரை 2 கிலோ மீட்டர் தூரத்துக்கான சுரங்கம் தோண்டும் பணி முற்றிலுமாக நிறைவடைந்து விட்டன.

தற்போது இந்த 2 ரெயில் நிலையத்துக்கும் இடையே தண்டவாளம் அமைக்கும் பணி நிறைவடைந்து உள்ளன. தொடர்ந்து சுரங்கப்பாதைக்கு செல்லும் வழிகள் முறையாக அமைக்கப்பட்டு வருகிறது. இந்தப்பாதையில் சிக்னல் அமைப்பதற்கான பணிகள் 50 சதவீதம் நிறைவடைந்து உள்ளன.

கொருக்குப்பேட்டை ரெயில் நிலைய பணிகளுக்கு இடையே, டோல்கேட் பகுதியில் இருந்து உயர்மட்ட பாதை மற்றும் ரெயில் நிலையங்கள் அமைக்கப்பட்டு வருகிறது. இதில் டோல்கேட்டில் இருந்து கவுரி ஆசிரமம் வரை உள்ள பணிகள் நிறைவடையும் நிலையை எட்டி உள்ளன.

கோயம்பேடு முதல் ஆலந்தூர் வரை உள்ள சாலை 100 அடி அகலமான சாலையாக இருந்ததால், அப்பகுதியில் மெட்ரோ ரெயிலுக்கான உயர்மட்ட பாதை கிரைன்கள் உதவியுடன் பாதை எளிதாக அமைக்கப்பட்டது. ஆனால் டோல்கேட்டில் இருந்து திருவொற்றியூர் விம்கோ நகர் வரை உள்ள 7 கிலோ மீட்டர் தூரம் கொண்ட சாலை, குறுகலான சாலையாக இருப்பதால் இந்த சாலையில், உயர்மட்ட பாதை அமைப்பது சவாலாக உள்ளது.

இந்தப்பாதையில் உள்ள சாலையில் கிரேன்கள் மற்றும் அதிக நீளம் கொண்ட டிரைலர் வாகனங்களை கொண்டு வந்து பணி செய்ய முடியாது என்பதால், நாட்டிலேயே முதன் முறையாக ‘லான்ஜிங் கிரிடர்’ என்று அழைக்கப்படும் ஒரு வகையான பாலம் கட்டும் நவீன எந்திரம் மூலம் நவீன தொழில் நுட்பத்தில் ஒரு இடத்தில் இருந்தபடியே சிமெண்டு சிலாப்புகள் கொண்டு சென்று உயர்மட்ட பாதை அமைக்கும் பணி நடந்து வருகிறது.

குறிப்பாக ஒரு தூணுக்கும் மற்றொரு தூணுக்கும் இடையே முன்னேறி செல்லும் நவீன எந்திரம் மூலம் இந்த பாதை அமைக்கப்படுகிறது.

அதேபோன்று முதல் கட்டத்தில் உயர்மட்ட பாதையின் அருகில் சாலையின் ஓரத்தில் ரெயில் நிலையங்கள் அமைக்கப்பட்டு உள்ளன. இதனால் அதிக அளவில் நிலங்கள் தேவைப்பட்டன. இதற்காக கூடுதல் நிதியும் செலவிடப்பட்டது. ஆனால் விரிவாக்கப்பணியில் உயர்மட்ட பாதையின் கீழே ரெயில் நிலையங்கள் அமைக்கப்பட்டு வருகின்றன. இந்த திட்டத்திற்கான செலவு முற்றிலும் குறைக்கப்பட்டு உள்ளது.

குறிப்பாக முதல் கட்டத்தில் சுரங்கப்பாதையில் உள்ள ரெயில் நிலையங்கள் 220 மீட்டர் நீளமும், 27 மீட்டர் அகலத்திலும் அமைக்கப்பட்டன. ஆனால் தற்போது அனைத்து ரெயில் நிலையங்களும் 148 மீட்டர் நீளமும், 20 மீட்டர் அகலத்தில் அமைக்கப்பட்டு உள்ளது. இதனால் இடம் மற்றும் கட்டுமான செலவினங்கள் முற்றிலும் குறைந்து உள்ளது. அடுத்த ஆண்டு ஏப்ரல் மாதம் இந்தப்பாதையில் சோதனை ஓட்டம் நடத்தப்பட உள்ளது. தொடர்ந்து ஜூன் மாதம் ரெயில் இயக்க திட்டமிடப்பட்டு உள்ளது. இவ்வாறு அதிகாரிகள் கூறினார்கள்.

Image result for dinathanthi